Leo Tolstoy

Scríbhneoir Rúiseach ab ea Leo Tolstoy, nó an Cunta Leo Nikolayevich Tolstoy (Rúisis: ''Лев Никола́евич Толсто́й​'', ). Rugadh in Yasnaya Polyana, in aice le Tula dhá chéad ciliméadar ó dheas ó Mhoscó é ar an 9 Meán Fómhair 1828, agus fuair sé bás in Astapovo ar an 20ú Samhain 1910. I ndiaidh Réabhlóid na Rúise, d'athraigh na húdaráis ainm Astapovo go Lev Tolstoy i ndilchuimhne ar an scríbhneoir. Úrscéalaí agus prós-scríbhneoir a bhí ann, agus áirítear ar rogha úrscéalaithe na litríochta domhanda é.

I ndiaidh dó a chuid mórshaothar a chríochnú, chuaigh Tolstoy le fealsúnacht shíochánachais dá dhéantús féin, agus bhí tionchar mór ag a chuid smaointí faoin bhfrithbheartaíocht shíochánta ar dhaoine mór le rá cosúil le Mahatma Gandhi agus Martin Luther King, Jr.

Is é an mórúrscéal eipiciúil úd ''Война и мир/Voyna i mir'' ("Cogadh is Síocháin") príomhshaothar an scríbhneora. Sa leabhar seo, tugann sé cur síos ar an dóigh a ndeachaigh ionsaí Napoléon ar an Rúis i bhfeidhm ar shaol na Rúiseach. Mórúrscéal eile é ''Анна Каренина/Anna Karenina''. Scríobh sé tríológ dhírbheathaisnéiseach freisin, ''Детство - Отрочество - Юность/Detstvo - Otrochestvo - Yunost´'' ("Aois an Linbh - Aois an Stócaigh - Aois an Ógánaigh"). Leag sé amach a fhealsúnacht phearsanta i leabhair ar nós ''Исповедь/Ispoved´'' ("Faoistin"), ''В чём моя вера/V chom moya vera'' ("Céard is creideamh dom"), ''Царство Божие внутри вас/Tsarstvo Bozhie vnutri vas'' ("Tá ríocht Dé istigh ionaibh") agus ''Воскресение/Voskresenie'' ("Aiséirí"). Curtha ar fáil ag Wikipedia